Konfederata e Sindikatave mbështet protestën e aktorëve kundër projektligjit për Artin dhe Kulturën të hartuar nga Ministria së Kulturës.
Përmes një komunikate për mediat, KSSH e cilëson një akt centralizues, ligjin e ri të Ministrisë së Kulturës, dhe që siç theksojnë artistët, i jep fuqi absolute ministres.
“Për ne si Konfederatë e Sindikatave ai është centralizues duke i dhënë pushtet absolut ministrit të Kulturës në emërimin e drejtorëve të institucioneve kulturore, bordeve artistike, krijimin e kolegjiumeve që miratojnë kalendarët dhe projektet artistike. Kjo është kthim në kohën e errët kur arti dhe kultura ishin vegël e partisë dhe pushtetit”, thuhet në njoftimin e KSSH –së.
Në të njëjtën kohë, Konfederata e Sindikatave shpreh indinjatën e thellë për sjelljen e Ministres së Kulturës, Mirela Kumbaro, karshi aktorit, Robert Ndrenika. Sipas KSSH –së, Ministrat do vijnë dhe ikin por vepra e këtyre artistëve është aset kombëtar që inspiron breza dhe mban gjallë artin dhe kulturën në këtë tokë.
“Ky institucion është i një rëndësie të veçantë dhe është absurde që zhvendosja e tij të bëhet pa miratimin e aktorëve, të cilët kanë një jetë që kontribuojnë për ngritjen dhe konsolidimin e këtij institucioni. Nuk mund të vendosen interesat meskine te një grupi biznesmenësh përpara kontributit të aktorëve shqiptare që i kanë dhuruar këtij populli emocione të pafundme. Konfederata e Sindikatave bashkohet edhe me shqetësimin e pedagogëve që kanë mbi një javë që nuk marrin pagat. Ministria e Arsimit krahas keqardhjes duhet të vihet në lëvizjes dhe brenda ditës së sotme duhet të bëjë të mundur kalimin e pagave për pedagogët. Mos kalimi i pagës për pedagogët është tregues i mungesës së seriozitetit të shtetit shqiptar”, theksohet në reagimin e KSSH –së.